Statkraft yn lansio ymgynghoriad statudol ar gyfer Fferm Solar Alleston yn Sir Benfro

Mae Statkraft, cynhyrchydd ynni adnewyddadwy mwyaf Ewrop, yn lansio ei ymgynghoriad statudol ar gynigion manwl ar gyfer Fferm Solar Alleston, a leolir rhwng Penfro a Llandyfái, yn Sir Benfro. Mae'r cynlluniau'n dilyn astudiaethau amgylcheddol helaeth ac adborth a dderbyniwyd yn ystod ymgysylltu cynnar a gynhaliwyd y llynedd. 
 
O ganlyniad i adborth, mae rhai newidiadau pwysig wedi’u gwneud i’r cynigion, gan gynnwys tynnu ardaloedd o baneli solar o gaeau ar hyd Heol Llandyfái Isaf ac o flaen y ffermdy rhestredig Gradd II, gan greu perllan i wella’r gosodiad treftadaeth a gwelliannau i ardaloedd bioamrywiaeth ledled y safle.  

Byddai gan y fferm solar arfaethedig gapasiti o tua 30MW a byddai'n cynhyrchu digon o ynni i bweru mwy na 14,000 o gartrefi, gan helpu i fynd i’r afael â’r argyfwng hinsawdd a lleihau allyriadau carbon. Byddai'r datblygiad arfaethedig yn cysylltu â'r grid cenedlaethol drwy linellau pŵer presennol; felly, ni fydd angen ceblau ychwanegol y tu allan i ffin y safle.  
 
Mae Statkraft wedi ymrwymo i gydweithio'n agos â'r gymuned leol i ddod â gwerth hirdymor a chyflawni prosiect y gellir ei ystyried yn ased lleol. Fel rhan o gynnig Fferm Solar Alleston, bydd Cronfa Budd Cymunedol yn cael ei sefydlu, a rhagwelir y bydd yn darparu £480,000 yn ystod oes y prosiect o 40 mlynedd.  
 
Dywedodd Gui Zandomeneghi, Prif Reolwr Prosiect Solar Statkraft: “Rydym wedi gwneud rhai newidiadau pwysig i'n cynlluniau, yn dilyn adborth o'r ymgysylltu cynnar y llynedd a chanlyniadau'r ymchwiliadau safle a'r arolygon. Hoffwn ddiolch i bawb sydd wedi cymryd yr amser i siarad â ni hyd yn hyn.  
 
“Mae prosiectau fel Fferm Solar Alleston yn hanfodol i oresgyn diogelwch ynni a’r argyfwng hinsawdd, gan hwyluso’r newid o danwydd ffosil i ynni carbon isel a chefnogi targed Llywodraeth Cymru i sicrhau bod trydan 100% yn adnewyddadwy erbyn 2035. Byddwn i'n annog pobl leol i ddod i un o’r digwyddiadau rydym yn eu cynnal a sgwrsio gyda fi a’r tîm.” 
 
Ceir rhagor o wybodaeth am y cynigion ar wefan y prosiect – www.alleston-solar.co.uk – a bydd aelodau o dîm y prosiect ar gael i drafod y prosiect yn nigwyddiadau'r ymgynghoriad: 

• 13:00-18:00 ddydd Mawrth 22 Hydref 2024 yn Neuadd y Dref Penfro, Stryd Fawr (SA71 4JS).
• 12:00-16:30 ddydd Mercher 23 Hydref 2024 yn Neuadd Bentref Llandyfái (SA71 5PB). 

Y dyddiad cau ar gyfer sylwadau yw hanner nos, dydd Mawrth 19 Tachwedd 2024.  
 
Yn dilyn yr ymgynghoriad statudol, bydd y cynigion yn cael eu cwblhau, a bydd cais Datblygiad o Arwyddocâd Cenedlaethol (DNS) yn cael ei gyflwyno i Benderfyniadau Cynllunio ac Amgylchedd Cymru (PEDW) i'w archwilio cyn cael ei benderfynu gan Weinidogion Llywodraeth Cymru.